Act 28 | PONPDN | STEP | KIT lao pitilar, se ap ronadar, me dake o adaneki Melite.

Acts 28

1 KIT lao pitilar, se ap ronadar, me dake o adaneki Melite. 2 A men liki kan me kadek on kit kaualap, pwe irail saunda kisiniai o kasamo kit karos, pweki katau moremor o pweki kapau. 3 Paulus lao wasai tui pena o kidi on nani iai, serpent men ap lusadar san nani iai pweki karakar o ten on ni lim a. 4 A men liki ko lao udial man o a teneten ni lim a, re ap kasokasoi nan pun arail: Melel aramas men et me kamelar aramas, a piti saner nan madau, ap rialar. 5 I ari sipede won man o nani iai o sota mesued kot lel on i. 6 Irail masamasan, ma a sota pan umposada de pupedi matala, a re lao masamasan warai o kilan, me a so suedi on, re wuki dalar ar lamelam o katitiki, me dene kot amen. 7 Saupeidi en dake o, me maraneki Puplius, kin sapaneki wasa o, kasamo o apapwali kit ran silu. 8 A sam en Puplius wononeki somau karakar o somau nta. I me Paulus koti don re a kapaka paki, pwil lim a kan po a, kakeladar i. 9 Men en lao wiauier, karos me somau nin dake, ap kodo kakelailadar. 10 O re pil kaka kin kit kaualap. Kit lao maseldar, irail ari kidan pon sop o at kapinwar kasampwal. 11 A murin saunipon silu se ian sop en Aleksandrien pot, me mimi ni dake o ni ansaun kapau, me kilel en mpor. 12 A se keredi Serakus o kairu wasa o pon sili pon. 13 O san wasa o se pidok tanatan lela don Rekium, o manda an air irepokedo o pon ta pon se lel on Puteoli. 14 I wasa o se tuon ia saulan kai, me poeki re at, sen mondi re ’rail pon isi pon. Kit ari tanatan kokolan Rom. 15 O saulan kan en wasa o lao ronadar duen kit, re ap kodo tu on kit Apipor o Tretapern; Paulus lao diar ir ada, ap kapina Kot o kaporopor maular. 16 Kit lao lel Rom, kaun en saunpei ap panalan kaun en silepa kan me salidi ko, a Paulus me saladok kotikot wasa toror, saunpei men me sinsila i. 17 Kadekadeo murin ran silu Paulus ap molipe pena saumas en Sus akai. Irail lao pokon penaer, a ap masani on irail: Ri ai ko, nan sota mesued kot, me i wiadar on aramas, de on lamalam en sam atail akan, ari so, nai me salidi o pakadara don ni pa en men Rom akan san Ierusalem. 18 Irail lao kalekalelapoki ia, ap men lapwa ia dar, pwe sota dip ai, me i en kame kila. 19 A Sus oko lao palian ia, i ap dorolan Sisa, kaidin ai men mpimpaki toun sap ai. 20 I me i ekera komail ki pena, i en kilan komail o kasokasoi on komail, pweki en Sus akan ar kaporopor, me i salikidi sal mata pot et. 21 Irail sapen i: Sota kisin likau, me se ale san Iudaa duen komui, pil sota saulan amen, me kodiao, me kaire kin kit o kadedeki, me dip omui mia. 22 A se men rona san komui duen omui lamelam, pwe se roner duen pwin wet, me re kin palian wasa karos. 23 Irail ari kileledi on i ran eu, ap pokon don re a nan im en kairu. I ari kawewe on irail o katitiki duen wein Kot, kapakaparok ki on irail Iesus san nan kapun en Moses o saukop akan, san ni mansan lel nin sautik. 24 Akai irail me kamelele a padak a akai so. 25 Irail ari sota minimin pena nan pun arail, re ap pur pasan ni en Paulus a katitiki masan pot et: Melel, saukop Iesaia kopadar ren Nen saraui on sam atail akan. 26 Masani: Ko won ren aramas pukat indada: Komail kin ron ap so lelapok ki o ninar, ap sota dedeki. 27 Pwe monion en aramas pukat suedalar, o salon arail ponlar, o mas arail mair penaer, pwe re de nar kida wasa mas ar, o ron kida wasa salon arail, o asaki nan monion arail o sapaledo, o I en kakele ir ada. 28 Komail ari en asa, me maur wot san Kot mueidalan men liki Kan o re pil pan peiki on. 29 I lao masanier mepukat, Sus oko ap ko pasan o kapakaparok nan pun ar kaualap. 30 A Paulus kotikot nan im eu, me a kin isesa par riau, o kasamo karos, me ko don i, 31 Kaweweda wein Kot o aima padapadaki duen Kaun Iesus Kristus pwe sota me inapwiedi.